లా'డెన్' కూల్చివేత! లాడెన్ స్థావరాన్ని కూల్చేయనున్న పాక్ ...

అంతర్జాతీయ ఉగ్రవాదానికి బ్రాండ్‌గా మారిన ఒసామా బిన్ లాడెన్ అంతమయ్యాడు. ఇప్పుడు అతడు చివరి ఘడియలు గడిపిన 'అబోత్తాబాద్' నివాసాన్నీ కాలగర్భంలో కలిపేందుకు సన్నాహాలు జరుగుతున్నాయి. ఒకవైపు ఉగ్రవాదులను దాస్తూ, మరోవైపు ఉగ్రవాదంపై పోరు అంటూ హడావుడి చేస్తున్నదన్న విమర్శలను ఎదుర్కొంటున్న పాకిస్థాన్ ప్రభుత్వం ఆ బురదను కడిగేసుకునే ప్రయత్నంలో పడింది. 

అందులోభాగంగా దేశంపై పడిన లాడెన్ 'మచ్చ'ను పూర్తిగా తుడిపేసేందుకు అబోత్తాబాద్‌లోని కోట లాంటి అతడి ఇంటిని కూల్చివేయాలని ప్రభుత్వం నిర్ణయించింది. వచ్చే నెలలో ఈ ధ్వంస రచనకు ముహుర్తం పెట్టనున్నట్టు ద సన్ పత్రిక తెలిపింది. "ఒక శత్రు కోటను కూల్చేసినట్టుగానే లాడెన్ నివాస భవనాన్ని పడగొట్టేస్తాం. లాడెన్‌కు సంబంధించిన చిన్న ఆధారాన్నీ నామరూపాలు లేకుండా చేస్తాం'' అని హోం మంత్రి రెహ్మాన్ మాలిక్ తెలిపారు.