అమ్మ పాత్రకు సిద్ధమవుతున్న ఐశ్వర్య...!

బాలీవుడ్ నటుడు అమితాబ్ బచ్చన్ ప్రస్తుతం చాలా చాలా హ్యాపీగా వున్నాడు. ఆనందంతో ఎగిరిగంతేస్తున్నాడు కూడా. దీనికి కారణం… త్వరలో తాను తాత కాబోతున్నాడు. కోడలు ఐశ్వర్యా రాయ్ త్వరలో తల్లికాబోతోంది. ఈ విషయాన్ని అమితాబే స్వయంగా చెప్పాడు. “అవును… నేను తాత అవుతున్నాను… ఐశ్వర్య తల్లి కాబోతోంది” అంటూ పొంగిపోతున్నాడు. ఇప్పుడీ వార్త బాలీవుడ్ లో హాట్ టాపిక్ అయింది.
ఎందుకంటే, ఇంతవరకు ఐశ్వర్య ఈ విషయాన్ని ఎక్కడా బయటపెట్టలేదు. ఆమె వస్త్రధారణను బట్టి మీడియా ఇటీవల ఊహించి రాసినప్పటికీ ఐష్ దానిని కన్ఫర్మ్ చేయలేదు. గతంలో ‘ఐష్ ఇక తల్లి కాలేదు..డాక్టర్లు ఈ విషయాన్ని నిర్ధారించారు’ అంటూ ముంబై మీడియా గాసిప్స్ రాసి, అమితాబ్ ఫ్యామిలీని బాధపెట్టిన సంగతి తెలిసిందే. అయితే, ఇప్పుడు అమితాబే ఈ వార్తను వెల్లడించడంతో అంతా ఐష్ కి కంగ్రాట్స్ చెబుతున్నారు. మరి, మరో అందాల రాశి పుట్టబోతోందా? లేక, మరో బుల్లి అభిషేక్ పుట్టబోతున్నాడా? అన్నదే ఇప్పుడు బాలీవుడ్ లో అందర్నీ క్యురియాజిటీలో ముంచెత్తుతోంది.