ఒంట్లో శక్తిని కరిగించే మందు బిళ్ల

ఒకే ఒక మాత్రతో ఎలాంటి శారీరక శ్రమ లేకుండానే దాని ఫలితం దక్కుతుంది! 40నిమిషాలు పరిగెత్తితే ఎంత శక్తి ఖర్చవుతుందో దాన్ని ఒక్క మందు బిళ్ల కరిగిస్తుంది. ఏమీ చేయకుండానే, నోరు కట్టేసుకోకుండానే రోజుకు 380కెలోరీల శక్తిని ఆవిరిచేస్తుంది! ఇప్పుడు అమెరికా, బ్రిటన్ దేశాల్లో ఈ మాత్ర వేలం వెర్రిగా అమ్ముడుపోతోంది. సెలబ్రిటీల దగ్గరనుంచి సాధారణ జనం వరకు అందరూ కొంటున్నారు.

కష్ట పడకుండానే బరువు తగ్గించగలిగే మాత్రను ఎవరు మాత్రం వదులుకుంటారు! ఆ మాత్ర పేరు 'నురాట్రిమ్'. బ్రిటన్‌లో విడుదలైన నాలుగు రోజుల్లోనే దీని కోసం 50వేల ముందస్తు ఆర్డర్లు వచ్చాయి. అమెరికాలోనూ కొద్దిగంటల్లోనే స్టాక్ అయిపోయింది! దీన్ని వేసుకుంటే ఒంట్లో శక్తి పెరిగి తినాలన్న కోరిక తగ్గుతుంది. ఆహారం వేగంగా జీర్ణమవడంతో పాటు కొవ్వు కూడా కరుగుతుందని ఈ మాత్రను సృష్టించిన జర్మన్ డాక్టర్ ఆల్‌ఫ్రెడ్ హజుల్‌బాషర్ తెలిపారు.

వైద్య ప్రయోగాల్లో ఇది నిరూపితమైందని, బరువు తగ్గాలనుకుంటున్న వారికి ఇది చాలా దోహదపడుతుందని చెప్పారు. శారీరక శ్రమ వల్ల కలిగే మార్పులే ఈ మాత్ర వల్ల కూడా జరిగేలా శరీరంలోని జీవక్రియ ప్రభావితమవుతుందని వెల్లడించారు. 65 మంది స్థూలకాయులపై జరిపిన అధ్యయనంలో ఈ మాత్ర వల్ల రెండు నెలల కాలంలో 90శాతం మంది కనీసం ఆరున్నర కిలోల బరువు తగ్గారని, ఇందుకోసం వారు ఎలాంటి ఆహారపు అలవాట్లను మార్చుకోలేదని వివరించారు. అయితే వారి ఆకలి మాత్రం 78శాతం తగ్గిపోయిందట!